Қазақстан мен Қытай мәдени-гуманитарлық қатынастарды дамытуға ниетті

15 Маусым, 2015 08:37

Қазақстан Республикасының Қытайдағы Елшісі Шахрат Нұрышев Қытай Халық Республикасының Мәдениет министрі Ло Шуганмен кездесті, деп хабарлады СІМ.

Кездесу барысында мәдени-гуманитарлық ынтымақтастықты дамыту, өзара ынтымақтастық бойынша шарт-құқықтық негізді жетілдіру, екі ел арасында мәдени орталықтарды құру мәселелері, сонымен қатар ү.ж. ҚР Конституциясының 20 жылдығын, Қазақ хандығының 550 жылдығын, қазақтың ұлы ойшыл ақыны Абайдың 170 жылдығын және қытайдың композиторы Сянь Синхайдың 110 жылдығына орайластырылған мәдени шараларды өткізуге арналған сұрақтар талқыланды.

Қазақстан мен Қытай арасындағы мәдени-гуманитарлық өзара ынтымақтастықтың жоғары қарқыны атап өтілді. Мәдени саладағы үлкен мүмкіндіктер мен әлеуетті бағыттардағы ынтымақтастықты ескере отырып, екі елде мәдени маусымдарды өткізуге қол жеткізілді.

ҚР Тұңғыш Президенті – Елбасы қорының қолдауымен Қазақстан Республикасының Қытай Халық Республикасындағы Елшілігі Бейжіңде «Абай оқуларын» және «Белгісіз Қазақстан» фотокөрмесін ұйымдастыру мәселелері келісілді.

Сұхбаттасушылар алдағы шаралар сәтті өткізіліп, екі ел арасында өзаратүсінушілік пен достықтың тереңдей түсуіне ықпал ететініне сенім білдірді.