С.Нүсіпов:ҰБТ тапсырғандардың 82 пайызы шекті деңгейден өтті

12 Маусым, 2015 16:34

2015 жылы Бірыңғай ұлттық тестілеу шарасына 82 мың 865 мектеп түлегі қатысып, олардың 82 пайызы шекті деңгейден өтті, яғни 50-ден жоғары бал алды, деді Білім және ғылым министрлігінің Білім беру мен ғылым саласын бақылау комитетінің төрағасы Саят Нүсіпов Орталық коммуникациялар қызметінде өткен баспасөз-мәслихатында.

«100 балдан жоғары алған түлектер саны 14 мың 420 оқушыны немесе 17,4 пайызды құрады, бұл өткен жылғы көрсеткіштен 2,4 пайызға көп. Шекті деңгей 50 балдан көп ұпай жинағандар саны 82 пайызды құрады»,-деді комитет төрағасы.

Оның сөзінше, 2015 жылы ҰБТ бойынша республика көлемінде 50 мың заң бұзу әрекеттері орын алды.

«Биылғы жылы жағдайды бақылауды нығайтылып, осы бағытта қолданылған қосымша шаралардың нәтижесінде заң бұзу әрекеттері 3,3 пайызға көп анықталды. Бұл шамамен 51 мың 370 заң бұзу әрекеттері, олардың ішінде өрескел заңбұзушылықтарға жол бергені үшін 48 оқушы сынақтан босатылып, олардың нәтижелері нөлге теңелді»,-деп қосты ол.

Естеріңізге сала кетейік, Қазақстанда бірыңғай ұлттық тестілеу шарасы 2015 жылы 2-8 маусым аралығында өтті. Ондағы орташа бал 79,5-ті құрады және бұл өткен жылғы көрсеткіштен 2,6 пайызға жоғары.

Анар Тәңірқұлова

Барлық жаңалықтар