ҚР ДСӘДМ : Қазақстанда жұмысынан айырылған азаматтарға әлеуметтік төлемдер тағайындау оңайлатылады

12 Маусым, 2015 13:10

2015 жылғы 1 маусымнан бастап Қазақстанда жұмысынан айырылған азаматтарға арналған композиттік қызмет енгізіледі. Енді жұмыспен қамту орталықтарында тіркеу кезінде азаматтар жұмысынан айырылу жағдайы бойынша Мемлекеттік әлеуметтік сақтандыру қорынан әлеуметтік төлемдер тағайындауға құжаттарын рәсімдей алады. Бұл туралы бүгін ҚР Президенті жанындағы Орталық комминикациялар қызметінде өткен брифингте ҚР Денсаулық сақтау және әлеуметтік даму вице-министрі Светлана Жақыпова мәлімдеді.

«Ағымдағы жылғы 1 маусымнан бастап жұмысынан айырылған азаматтар үшін композиттік қызмет енгізілді. Енді азаматтар жұмыспен қамту орталықтарында жұмыссыз ретінде тіркеліп қана қоймай, жұмысынан айырылған жағдайы бойынша Мемлекеттік әлеуметтік сақтандыру қорынан әлеуметтік төлемдер тағайындауға құжаттарын рәсімдей алады», - деді С.Жақыпова.

Осылайша, жұмыссыз ретінде тіркелген міндетті әлеуметтік сақтандыру жүйесіне қатысушы тұлғаға жұмысынан айырылған жағдайда әлеуметтік төлемдер тағайындау үшін Мемлекеттік зейнетақы төлеу орталығына немесе Халыққа қызмет көрсету орталығына қосымша барудың қажеті жоқ.

Вице-министр атап өткендей, қазіргі уақытта ҚР ДСӘДМ әлеуметтік-еңбек саласында көрсететін 36 қызметтің 15-і түрлендірілген. Мемлекеттік органдардың ақпараттық жүйелерін ықпалдастыру операциялық шығындарды азайтуға, ұсынылатын қызметтердің қолжетімділігін қамтамасыз етуге, сапасы мен тиімділігін арттыруға мүмкіндік береді.

Ботагөз Айтжанова

Барлық жаңалықтар