Астанадағы ғылыми конференцияда қазақ хандығының атақты ханымдары туралы айтылды

12 Маусым, 2015 12:34

Л.Н. Гумилев атындағы Еуразия ұлттық университетінде Қазақ хандығының 550 жылдығына арналған «Қазақ хандығы тұсындағы ханымдар мен арулар» атты ғылыми-тәжірибелік конференция өтті.

Конференция барысында ҚР-ның еңбек сіңірген қайраткерлері қол үзіп қалған немесе есімдері ұмытылып кеткен ел мақтаныштарының есімін анықтап, қалпына келтіруге бағытталған зерттеулерді жүргізу маңыздылығын атап өтті.

«Қазақ хандығының 550 жылдығы ол қазақ даласындағы әйел затының біздің мемлекеттігіміздің қалыптасуында атқарған ролін түсіну болып табылады. Егер біздің салт дәстүріміз генетикалық ақпараттық кодымыз болса, онда ол кодты алып жүрушілер әйелдер қауымы. Қазақ хандығының тарихында жау жүрек жауынгер болған әйелдер, әділін айта білген қазылар мен хандарымыздың данышпан кеңесшілері қатарында әйел баласы болған. Бұл конференция аталмыш тақырыпта өте маңызды, себебі қазақ ханымдары мәселесі бұған дейін еш жерде талқыланбаған»,- деді ҚР Президентi жанындағы Әйелдер iстерi және отбасылық-демографиялық саясат жөнiндегi ұлттық комиссия төрағасының орынбасары Ләззәт Сүлеймен.

Өз кезегінде қатысушылар мен студенттер қауымы үшін қазақ даласы әйелдерінің данышпандығы, көрегендігі мен кемеңгерлігі туралы жан-жақты ақпарат берілді.

Бұдан басқа, қатысушылар үшін қазақ хандығының 550 жылдығына арналған арнайы көрме ұйымдастырылды.

Индира Кауметова