Жол бойындағы қызметтер республикалық маңызы бар жолдардың қысқы күтіміне дайындық жұмыстарын жүргізуде

11 Маусым, 2015 20:03

2015-2016 жылғы қыс мезгіліне жол қызметтері дер кезінде сақадай сай болуы үшін, «Казахавтожол» РМК қазірден бастап техникаларды және арнайы құрал-жабдықтарды, өндіріс базаларын жөндеуден өткізуге қатысты бірқатар іс-шаралар атқару туралы Бұйрық шығарды.

Бұйрыққа сәйкес, 15 маусымнан бастап жол пайдалану техникалары мен өндірістік базаларды жоспарлы жөндеу жұмыстарына кіріседі, ал 1 шілдеден бастап РМК барлық филиалдарында автомобиль жолдарының қысқы күтіміне байланысты жұмысшы штабтары құрылады, деп хабарлады «ҚазАвтоЖол».

Аталған мәселелер «ҚазАвтоЖол» ҰК» АҚ Басқарма төрағасының орынбасары Ұлан Әліповтың басшылығымен өткен селекторлық жиында сөз болды. Оның айтуынша, бүгінгі таңда автомобиль жолшыларының қызметі жолды жөндеу және пайдаланумен ғана шектелмеуі тиіс. Қазіргі уақыттағы басты мәселелердің бірі – автомобиль жолдарының қысқы күтіміне барлық жол-пайдалану техникаларын сақадай сай ұстау, жол бойындағы жылыту пункттерін дайындау болып табылады. Сондай ақ, арнайы техникаларды, жанар-жағар майды, тайғанаққа қарсы қолданылатын материалдардың қоры, қар тоқтататын құралғылар мен көмір сақтайтын өндірістік базаларды да ертерек жөндеуден өткізу қажет.

«Біз жыл бойы республикалық жолдардың бойында көлік қозғалысының қауіпсіздігін қамтамасыз етуіміз керек. Ол үшін қоғамдық, жүк және жеңіл көліктер өтетін негізгі жол тораптарын дұрыс пайдаланып, жағдайды бақылауда ұстауымыз қажет» – деді Ұ.Әліпов.

Қысқы күтімнен бөлек республикалық жолдарда жүріп жатқан күрделі және орташа жөндеулер мәселесі де сөз болды. Биыл республикалық жолдарға күрделі, орташа және ағымдағы жөндеу жүргізіп, күтіп ұстауға, көгалдандыруға, зерттеу жүргізіп, ақауларын анықтау жұмыстарына жалпы 37,5 млрд теңге бөлінген. Бүгінгі таңда 308 шақырым жолда күрделі жөндеу жүріп жатыр. Оның 83 шақырымы биыл пайдалануға беріледі. Орташа жөндеу 1 077 шақырым жолда жүріп жатыр. Мердігер компаниялар анықталған, қазір келісім-шарттар жасалу үстінде.

Жиын соғында Ұ.Әліпов АҚ мен РМК барлық филиалдарына техника мен жұмысшыларды шоғырландыруды бақылауға алып, үнемі өндірістік жұмыстардың мониторингін жүргізуді және атқарылып жатқан жұмыстардың сапасына баса назар аударуды тапсырды. Барлық атқарылып жатқан өндірістік жұмыстардың сапалық көрсеткішіне қатысты жауапкершілік филиалдардың басшыларына жүктелді.

Барлық жаңалықтар