• Басты
  • Алматы облысының оқушылары халықаралық олимпиадаларда 167 медаль жеңіп алды (Фото)

Алматы облысының оқушылары халықаралық олимпиадаларда 167 медаль жеңіп алды (Фото)

11 Маусым, 2015 09:13
Алматы облысының әкімі Амандық Баталов өңірдегі дарынды балалармен жүздесті. Кездесуге республикалық, халықаралық пән олимпиадаларының жүлдегерлері, ғылыми жоба жарыстарының жеңімпаздары - жалпы саны 73 оқушы және олардың ұстаздары қатысты, деп хабарлады облыс әкімдігі.

«Жастар - біздің болашағымыздың негізі», - деп Елбасы дарынды жастарға үлкен сенім артып отыр. Себебі елімізге іскер, белсенді, жаңа идеясы бар мамандар аса қажет. Мұндай мықты мамандар күні ертең осы залда отырған дарынды балалардан шығатынына сенімім мол, - деді аймақ басшысы.

Мұхтар Арын атындағы №24 «Экономика және бизнес» арнаулы лицейінің» 11-сынып оқушысы, Орал қаласында өткен жаратылыстану-математикалық бағыт бойынша республикалық олимпиаданың қола жүлдегері Санжар Бұрұмбай сөз сөйлеп, «Балалық шақтың арманы» атты бейнефильмінің тұсаукесерін ұсынды.

Сонымен қатар Оңтүстік Кореяның Тэджон қаласында а өткен І Халықаралық «Жас ғалым» ғылыми жоба байқауының жеңімпаздары Заңғар Мұсағалиев пен Аружан Қалиева ауыл шаруашылығына қатысты, атап айтқанда картопты шіріп кетуден сақтайтын ғылыми жобаларымен таныстырды. Сол сияқты Теміртау қаласында болған VII Президенттік олимпиаданың күміс жүлдегері Мөлдір Болатбекова сөз сөйлеп, Сочи қаласында өткен Халықаралық робототехника олимпиадасының 3 орын жүлдегерлері, Назарбаев зияткерлік мектебінің оқушылары Бек Талғат пен Ратмир Сатпаев өз жобаларын көпшілік назарына ұсынды.

Жалпы, өткен жылы оқушыларымыз халықаралық жарыстарда 155 медальға ие болса, биылғы жылы 167 медальді жеңіп алды. Соның нәтижесінде республика бойынша екінші орыннан көрініп, «Үздік команда» атағына ие болды.

Естеріңізге салсақ, бұған дейін облыс әкімі Амандық Баталов еліміздің алдыңғы қатарлы жоғары оқу орындарының ректорларымен кездесіп,тұрмысы төмен отбасынан шыққан 91 түлекке грант бөлу туралы меморандумға қол қойған. Оған қоса Алматыдағы «Хейлиберри» мектебіне 10 оқушыны кәсіпкерлердің демеушілігімен оқыту туралы да келісімге қол жеткізілген болатын.

 

 

 

Барлық жаңалықтар