«Startup «Bolashak» ең үздік бизнес-бастамасына 15 млн теңгеге дейін бөлінеді

9 Маусым, 2015 16:57

«Startup «Bolashak» ең үздік бизнес-бастамасы үшін, жобаны жүзеге асыруға 15 млн теңге бөлінеді, деді «Болашақ» қауымдастығы Кеңесінің төрағасы Қуандық Бишімбаев Орталық коммуникациялар қызметінде.

«Грант мөлшері әлі талқыланады. Ол жеке өзіңнің бизнесіңді ашу үшін жетерлік сома болады, яғни 10-15 миллион теңге көлемінде. Сонымен қатар бизнес-қауымдастық өкілдерінен құрылған әділқазылар алқасының мүшелері, ірі компаниялардың жетекшілері егер жоба болашағынан үміт күттіретін болса, осы байқау аясында оған инвестиция салы,п қолдау көрсетеді»,-деді Қ.Бишімбаев.

Оның сөзінше аталмыш байқауға жасы 18-29 аралығындағы кез-келген азамат өтініш бере алады.

«Жалпы біздің кәсіпкерлікті дамытуға бағытталған стратегиямыз барлығы үшін ашық. Бұл бастама қауымдастық тарапынан қолға алынып отыр. Бірақ, ол 18 бен 29 жастағы барлық азаматтар үшін ашық. Бұл ретте байқауға қатысушылардың «Болашақ» бағдарламасымен білім алған болуы міндетті емес екендігін айта кету керек. Егер жақсы бизнес-идея болса, қауымдастық ісін жаңа бастап отырған болашақ кәсіпкерге арнайы гранттар бөледі»,-деді Кеңес төрағасы.

«Startup «Bolashak» байқауы 2015 жылдың 17 маусымынан басталды.

Анар Тәңірқұлова

Барлық жаңалықтар