«Жас ұлан» республикалық мектебін 75 ұлан тәмамдады (Фото)
«Жас ұлан» мектеп қабырғасынан биылғы жылы 75 ұлан түлеп шығады. Бұл мектеп құрылғалы бері саны жағынан ең үлкен болып табылады. 2013 және 2014 жылдары мектеп 55 және сәйкесінше 64 ұланды түлетіп шығарды. «Жас ұлан» тәрбиеленушілерінің 2015 жылғы ҰБТ-дағы орташа балы 85,2 құрады.
Бұл деңгей былтырғы жылға қарағанда жоғарырақ болды (2014 жылы - 81,3). Бүгін болашақта Қарулы Күштер мен өзге де күштік құрылымдардың офицерлері, өз Отанының нағыз қорғаушылары болатын түлектерге, сондай-ақ іс-шара қонақтарына ҚР ҚК 68665 ә/б құрмет қарауыл ротасының қысқартылған парадтық есептобының дефилесі көрсетілді.
Салтанатты шараға Қорғаныс министрлігінің өкілдері, ұландардың ата-аналары, Қарулы Күштердің ардагерлері қатысты. «Жас ұлан» мектебі тәрбиеленушілерінің дайындық деңгейі жыл сайын өсіп келе жатқанын атап өткен жөн. Бітіруші ұландар ұлттық бірыңғай тестілеуден сүрінбей өтіп, жоғары нәтижелер көрсетуде.
Былтырғы жылы «Жас ұлан» 64 бітірушіні түлетіп шығарғанын еске салайық. Бүгінде олардың барлығы Құрлық әскерлерінің Әскери институтында, Кеңес Одағының екі мәрте батыры Талғат Бигелдинов атындағы Әуе қорғанысы күштерінің Әскери институтында, Радиоэлектроника және байланыс әскери-инженерлік институтында, ҚР ҰҚК, ТЖМ және ІІМ жоғары оқу орындарында білім алуда. Сондай-ақ, Ресей, Беларусь және Қытай қорғаныс министрліктері әскери жоғары оқу орындарының курсанттары болып табылады.
