Өскеменде «Bala Turkvizyon» Халықаралық ән байқауына іріктеу басталды (Фото)

9 Маусым, 2015 18:03

Өскемен қаласында таңғы сағат сегізден бастап алғашқы Халықаралық «Bala Turkvizyon» ән байқауына іріктеу басталды. Кезең қорытындысы бойынша, аймақтан үздік шыққан қатысушы ағымдағы жылдың 16-17 қыркүйегінде Астана қаласында өткізілетін ұлттық іріктеуде бағын сынайды, деп хабарлайды ШҚО Ақпараттық орталығы.

Өскемендегі Металлургтер Мәдениет сарайында 8-13 жас аралығындағы қатысушылар жиналған. Дарынды бүлдіршіндердің әрқайсысы өзіне белгіленген нөмір бойынша шығып, қазылар алдында өнерін көрсетеді. Қазылар қатарында бүгінгі күні елге танымал продюсер Ерік Тастамбеков, Иван Бреусов және Санда сынды танымал эстрада жұлдыздары бар. Байқауға іріктеу кешке дейін жалғасады.

Естеріңізге сала кетсек, финалда қазылар алқасының мүшелері байқаудың жеңімпазын анықтап, ол «Bala Turkvizyon» байқауының гранд-финалында Қазақстан Республикасын танытуға аттанады. Байқауға қатысушылар сыйлықтар мен гранттардың лауреаттарына айналады және өз оқуларын жалғастырып, бұдан әрі ұштала түсу мүмкіндігіне ие болады.

"Bala Turkvizyon» Халықаралық ән байқауының Гранд-финалы Түркіменстанның Мары қаласында күзде өткізіледі.