Қазақстандық әскери музыканттар Санкт-Петербургте өтетін «Труба мира» II-халықаралық фестиваліне аттанады

8 Маусым, 2015 17:14

Қазақстан Қарулы Күштерінің әскери музыканттары «Труба мира» үрлемелі оркестрлердің ІІ-халықаралық фестиваліне қатысуға дайындалуда, деп хабарлады ҚР Қорғаныс министрлігі.

Ол маусымның 27-і мен шілденің 1-і аралығында Санкт-Петербургте өтеді және бес елдің Қазақстан, Қырғызстан, Тәжікстан, Ресей және Қытайдың үздік әскери оркестрін жинайды. Халықаралық шараға қатысу үшін біздің елден Орталық әскери оркестрдің 45 муызканты іріктелініп алынды.

«Қазір біз репетицияға кірісіп кеттік. Қазақ ұлттық әуендеріне мән бергіміз келеді. Біздің сазгерлердің белгілі музыкалық шығармалары мен халық әндерінен топтастырылған попурри болады», - деді ҚР ҚК Әскери оркестр қызметінің бастығы майор Тимур Жартыбаев.

Қазақстандық әскери музыканттардың осындай деңгейдегі фестивальдерге қатысуда үлкен тәжірибесі бар. Олар өздерінің бірегей өнерлерімен қазақстандық қана емес, сонымен бірге шетелдік тыңдарманның ыстық ықыласына бөленіп үлгерді.

Орталық әскери оркестр ұжымына таяу және алыс шет елдерінен байқаулар мен фестивальдерге қатысуға ұдайы шақыртулар келіп жатады. Әскери музыканттар ағымдағы жылы Ресей, Швейцария және Германияға гастрольдік сапармен баруды жоспарлап отыр.

Барлық жаңалықтар