• Главная
  • Алматы облысында «Мерейлі отбасы» байқауының жеңімпаздары 1 млн теңге ақшалай сыйлық алды (Фото)
6 июня, 2015 15:02

Алматы облысында «Мерейлі отбасы» байқауының жеңімпаздары 1 млн теңге ақшалай сыйлық алды (Фото)

Талдықорған қаласындағы І.Жансүгіров атындағы Мәдениет сарайында «Мерейлі отбасы» ұлттық конкурсының облыстағы жеңімпаздарын облыс әкімі Амандық Баталов марапаттады. Жалпы 38 жеңімпаз отбасыларына дипломдар, ақшалай және бағалы сыйлықтар тапсырылды, деп хабарлады облыс әкімдігі.
Алматы облысында «Мерейлі отбасы» байқауының жеңімпаздары 1 млн теңге ақшалай сыйлық алды (Фото)

«Біз - атаны асқар тауға, ананы мөлдір бұлаққа, баланы жасыл құраққа теңеп, бала тәрбиесін ұлы мақсат тұтқан елміз. Сондықтан ата заманнан қалыптасқан осы ұлттық тәрбиені өскелең ұрпаққа жеткізу - біздің қасиетті борышымыз. Сондықтан Елбасы әр Жолдауында көпбалалы отбасына, ана мен балаға қамқорлық жасауға және өмір сапасын жақсартуға үнемі көңіл бөлуде. Мемлекет басшысының бастамасымен қолға алынған осы «Мерейлі отбасы» байқауы жыл өткен сайын өзінің өміршеңдігін дәлелдеп келеді.  Себебі байқауға қатысушы отбасылар саны да жылдан жылға артып отыр. Өткен жылы 172 отбасы қатысса, биылғы жылы конкурста 253 отбасы бақ сынады. Бұл - қуанарлық жай. Байқауға қатысушылардың барлығын да құттықтай отырып, әр шаңыраққа береке-бірлік, өнегелі ғұмыр тілеймін!» - деді облыс басшысы А.Баталов.

Марапаттау рәсімінде «Мерейлі отбасы» байқауының жеңімпазы ретінде алакөлдік Оспановтар әулеті мен Панфилов ауданынан келген Қалиевтер отбасы аталып, облыс басшысы әр отбасына 1 млн. теңгеден ақшалай сыйлық пен дипломдар тапсырды.

 Сол сияқты байқаудың «Өрелі рухты отбасы» номинациясы бойынша Еңбекшіқазақ ауданынан Донбаевтар отбасы мен Ескелді ауданынан Исмайыловтар отбасы жеңімпаз атанса, «Бесігі түзу, несібесі артқан отбасы» номинациясында Ұйғыр ауданынан келген Васлиовтар мен Райымбек ауданынан Назаровтар қара үзіп шықты. Оларға арнайы дипломдар мен теледидар сыйға тартылды.

Байқауға қатысқан өзге де 32 отбасының әрқайсына 50 мың теңгеден ақшалай сыйлық және облыс әкімінің алғыс хаты табысталды.

Шара барысында ерлі-зайыпты өнерпаздардың әні мен биінен концерттік нөмірлер ұсынылды.