Алматыда «Мерейлі отбасы» өңірлік кезеңінде 3 отбасы жеңімпаз атанды

Үлгілі отбасыларды марапаттау салтанатына Алматы әкімі Ахметжан Есімов, қоғамдық ұйымдардың, отбасыларды әлеуметтік қолдау бірлестіктері мен дағдарыстар орталықтарының өкілдері қатысты.

Қала әкімі Мемлекет басшысы Нұрсұлтан Назарбаевтың бастамасымен қолға алынған бұл байқаудың отбасының адамгершілік қасиеттерін, отбасы мен некенің өміршеңдігін үлгі етуде, жалпы отбасының мәртебесін арттыруда барынша маңызды әрі актуальді екендігін атап өтті.

«Осынау отбасылық тамаша фестивальдің маңызы өте зор. Оған дәлел - биылғы байқауға былтырғы жылға қарағанда екі есе көп отбасының қатысуы.Олардың барлығы түрлі кәсіптің, этностың және еңбек әулетінің өкілдері», - деді Ахметжан Есімов.

Мемлекет отбасыларға жан-жақты қолдау көрсетуде. Нәресте өмірге келген кезде бір реттік жәрдем ақша және бала бір жасқа толғанша әлеуметтік жәрдем көрсетіледі әрі көпбалалы аналар да жәрдем ақша алады. «Қолжетімді баспана» мемлекеттік бағдарлама аясында 800-ден астам көпбалалы және жас отбасы өзге де әлеуметтік жағынан қорғалатын тұрғындармен бірге пәтер кілттерін алды.

Қала басшысы сыйлықтарды тапсыру барысында Алматыдағы отбасылық- демографиялық жағдайдың оң динамикасын атап өтті.Мысалы, соңғы 5 жыл ішінде мегаполис тұрғындарының орташа өмір сүру жасы 4 жылға артып, 74,6 жасты құраған (ерлер – 70,2, әйелдер – 78,3). Өмірге сәбидің келу динамикасы да тұрақты. Мысалы, өткен жылы Алматыда 42 мың нәресте дүниеге келген, бұл - еліміздің әрбір тоғызыншы баласы. Ана өлімі 6есе, ал сәби өлімі 2 есе төмендеген.