Қ.Жақыпов Сауд Арабия елшісімен кездесті
Кездесу иелері екі ел арасындағы ықпалдастықты, әсіресе, сауда-экономикалық байланыстарды, көпжақты және парламентаралық қарым-қатынасты одан әрі күшейтуге айрықша назар аударды, деп хабарлады Мәжілістің баспасөз қызметі. .
Қ. Жақыповтың айтуынша, алдағы уақытта біздің еліміз аталған мемлекетпен ауылшаруашылығы, фармацевтика, мұнай-газ, басқа да экономикалық басым бағыттарда өзара тиімді ынтымақтастық орнатуға ынталы.
«Өз кезегінде елші Сауд Арабиясы Корольдігінің Қазақстан тәуелсіздігін алғашқылардың бірі болып мойындаған күннен бастап өзара түсіністік пен сенім аясында қолға алынып келе жатқан маңызды шараларға көңіл бөліп, алдағы уақытта барлық салада өзара байланысты одан әрі дамытуға дайын екендіктерін жеткізді», - делінген хабарламада.
Сондай-ақ, елші Парламент Мәжілісі делегациясын өз елдеріне ресми сапармен келуге шақыра отырып, оның екіжақты қатынасты, соның ішінде, парламентаралық әріптестікті нығайтуға ықпал ететінін атап өтті. Палата Спикері Сауд Арабиясы Корольдігінің Қазақстанның БҰҰ Қауіпсіздік Кеңесінің тұрақты емес мүшелігі кандидатурасына, сондай-ақ, Астанада «ЭКСПО-2017» халықаралық көрмесін өткізуге көрсеткен қолдаулар үшін ризашылығын айтып, тараптың аталған көрмеге белсене қатысатынына сенім білдірді.
