Мемлекеттік рәміздер күні ҚР әскери қызметшілері Елтаңба авторымен кездесті
«Қазақстан Республикасының мемлекеттік рәміздеріне 23 жыл толуына орай Әуе қорғанысы күштері бас қолбасшылығының басқармасында әскери қызметшілер Мемлекеттік Елтаңбаның авторы Жандарбек Мәлібековпен салтанатты кездесу ұйымдастырды», - делінген хабарламада.
Елтаңба авторы авиаторлармен әңгіме барысында еліміздің төл рәміздерін құру, оның Қазақстанның қалыптасуы мен дамуындағы маңыздылығы туралы айтып берді. «Әр адамның көш бастаушы жұлдызы болуы тиіс. Осындай жұлдыз мемлекетке де қажет.
Мемлекеттік рәміздердің негізінде біз қазақстандықтардың Отанға деген сүйіспеншілік, ел тұрғындарының мақтаныш сезімдерін нығайтуға, Қазақстанның жетістіктері мен құндылықтарын насихаттауға, Елбасының қоғамдағы тұрақтылық пен келісімді қамтамасыз ету, халықтың әл-ауқатын арттыру жөніндегі жүргізілетін саясаттын түсіндіруге тиіспіз», - деді Жандарбек Мәлібеков. Осы орайда офицерлер де осынау ерекше күнді әр қазақстандықтың білуі мен қастерлеудегімаңыздылығын атап өтті.
«Мемлекеттік рәміздер күнін мерекелеу еліміздің мемлекеттік нышандарына құрмет көрсету негізінде қоғамды нығайту, тарихи құндылықтар мен қазақстандықтардың бірлігін сақтау болып табылады», - деді ҚР ҚК ӘҚК бас қолбасшысының тәрбие және идеологиялық жұмыстар жөніндегі орынбасары полковник Тұралы Қойшықұлов. Мемлекеттік рәміздер – бұл егемендігіміздің ерекше құндылығы, еліміздің тәуелсіздігі мен халық бірлігінің негізі.1992 жылғы 4 маусымдағы «Мемлекеттік рәміздер туралы» ҚР Заңының шығуы Қазақстанның тәуелсіз мемлекеттілігін нығайтып, еліміздің даму жолындағы жаңа бастама болды.
