Б.Сапарбаев: ҰБТ тапсырып жатқан жастардың 20 пайызы 100-ден жоғары балл алды

4 Маусым, 2015 11:36

Бүгінгі таңда Ұлттық бірыңғай тестілеуден өтіп жатқан жастардың 20 пайыздан астамы 100-ден жоғары балл алды – бұл өте жақсы нәтиже, деді Премьер-Министрдің орынбасары Бердібек Сапарбаев Астанадағы С.Сейфулин атындағы Қазақ агротехникалық университетіндегі Ұлттық бірыңғай тестілеу тірегінде.

«Мен бүгін ҰБТ қалай өтіп жатқандығын көру үшін мұнда арнайы келдім. Бүгін ҰБТ өтіп жатқан үшінші күн. ҰБТ жақсы өтіп жатыр, көрсеткіштер өткен жылғыдан жоғары. Биылғы жылы түлектердің 70 пайызы ҰБТ-ға қатысуда. Тест тапсырып жатқан балалардың 20 пайыздан астамы 100-ден жоғары балл алды. Бұл өте жақсы көрсеткіш. Бәрі де балалардың өздеріне байланысты. Егер 11 жыл бойы жақсы оқыған болса, бүгінде олар сынақты «жақсы» деген бағамен тапсырады. Бүгін мен олармен жолықтым, балалардың барлығының көңіл-күйлері жақсы, бәрі де тапсырып шығамыз деп оқталып отыр. Барлығы жақсы тапсыруға ниеттеніп отыр, сондықтан алаңдамаңыздар»,-деді Б.Сапарбаев мектеп түлектерінің ата-аналарымен болған кездесуінде.

Вице-премьер биыл Үкіметтің Мемлекет басшысының міндеттеуімен ҰБТ бойынша біраз өзгерістер енгізгендігін еске салды.

«Ең басты өзгешелік – орташа бағаға қатысты болды. Орташа баға аттестат бойынша және бүгінгі тестілеуден алатын бағалары бойынша қойылады. Сонымен қатар, ҰБТ-ны тапсыру мерзімі өзгертілді. Бұрын бұл мерзім бір апта болса, бұл жолы екі аптаға созылады. Бүгін түлектер тест тапсырып жатыр, егер олар комиссия шешімімен келіспейтін болса, аппеляцияға бере алады. Мұнда тәртіп пен заңды қадағалау үшін бірнеше комиссия жасақталып жұмыс істеп жатыр»,-деді ол.

Естеріңізге сала кетейік, 2015 жылы Ұлттық бірыңғай тестілеу 2-8 маусым аралығында өтеді.

Анар Тәңірқұлова