Астана Әлемдік және дәстүрлі діндер лидерлерінің V съезіне дайындалуда

3 Маусым, 2015 14:18

Әлемдік және дәстүрлі діндер лидерлерінің V съезі халықтар мен мемлекеттер арасындағы бейбітшілік пен ынтымақтастықты нығайтудың маңызды бөлігі болып табылады, өйткені жиын ғаламдағы шиеленістердің барлығының шешілуіне мүдделі, деді Парламент Сенатының депутаты Икрам Адырбеков Орталық коммуникациялар қызметінде өткен баспасөз мәслихатында.

«Жаһандық деңгейдегі қауіатер мен қатерлердің шиеленіскен тұсында Әлемдік және дәстүрлі діндер лидерлерінің съезі осы діндер мен өркениеттер арасында диалог қалыптастыратын маңызды институттардың бірі болып отыр. Съездің осыған дейін жиындарында оған ислам, христиан, иудаизм, буддизм мен өзге де дәстүрлі діндердің танымал өкілдері қатысты. Халықаралық форум халықтар мен мемлекеттер арасында бейбітшілік пен ынтымақтастықты қалыптастыруда маңызды бөлік болып табылады және оның бүкіл әлеуеті ғаламдағы шиеленістерді тұрақтандыруға бағытталған»,-деді И.Адырбеков.

Депутат халықаралық сарапшылардың Әлемдік және дәстүрлі діндер лидерлері V съезі «Дін көшбасшылары мен саяси қайраткерлердің бейбітшілік пен бірлік жолындағы диалогы» тақырыбында өтіп жатқандықтан ол конфессияаралық келісімді нығайтуға үлес қосатындығын айтып жатқандығын жеткізді.

«Бүгінде съезд жұмысына әлемнің 42 мемлекетінен 80 делегация қатысуға ниет білдірді, олардың арасында 14 дәстүрлі дін өкілдері бар. Шара аяқталған соң бесінші съездің қатысушыларының астаналық декларациясы қабылданады»,-деді депутат.

Естеріңізге сала кетейік, Әлемдік және дәстүрлі діндер лидерлерінің V съезі 2015 жылдың 10-11 маусымы аралығында Астанада өтеді.

Ботагөз Айтжанова