ШҚО-да тамызға дейін 3 балабақша пайдалануға берілмек

Шаһарда «Балалар планетасы» мен «Балдәурен» балабақшасы мемлекеттік-жекеменшіктік серіктестік аясында салынса, «140 балаға арналған балабақшаның» құрылысы мемлекеттік тапсырыспен жүргізілуде.

Қос балабақша 300-ге жуық балаға, «Балдәурен» 420 балаға арналған. Балабақшалардың екеуін шілденің соңына дейін іске қосу жоспарланып отыр. Ал 150 балаға шақталып салынған «Балалар планетасы» бүлдіршіндерді қабылдауды бастап кеткен.

Аталмыш балабақшаның директоры Расул Құрбанов осы уақытқа дейін 67 бала тіркелгенін айтып өтті. Оның айтуынша, бала саны толтырылған жағдайда құрамда жасақталған 3 топтың бірі мемлекеттік тілде болмақ. Өңір басшысы Даниал Ахметов Елбасы Нұрсұлтан Назарбаевтың тапсырмасы Риддерде табысты түрде жүзеге асырылып жатқанын жеткізді.

«Мердігерлер мемлекет тарапынан тапсырыс алып, жеке бизнесін өркендетіп, мемлекеттік-жекеменшіктік серіктестік өз жемісін беріп отыр. Бұл қарқынмен Риддер қаласындағы балабақша жетіспеушілігі мәселесі бір жылда, ары кетсе бір жарым жылда шешімін табатын болады», – деді облыс әкімі.

Айта кету керек, Риддер қаласы бойынша жаңа туған нәрестемен есептегенде 2300 бала болса, оның 900-і балабақшаға кезекте тұр.