Астаналық ТЖ департаменті қызметкерлерінің балалары суреттер конкурсына қатысты (Фото)

1 Маусым, 2015 12:46

Астаналық өрт сөндіру қызметінің №16 өрт сөндіру бөлімінің аумағында, Халықаралық балаларды қорғау күні қарсаңында асфальт бетінде сурет салу бойынша конкурс өтті, деп хабарлады Астана қаласы ТЖД.

Іс-шараға Астаналық өрт сөндіру қызметі бастығының орынбасары, өртке қарсы қызмет полковнигі С.Ж.Тұраров, Департамент қызметкерлері мен олардың отбасылары қатысты.

«Балалар салған суреттерінде отбасы мүшелерін, Елорда мен еліміздің символдарын бейнеледі. Сайысқа 5-10 жас аралығындағы бүлдіршіндер қатысты. Әр баланың салған суреті ерекше болды. Мысалы, 6 жасар Дилнас табиғатты, үйді, құстар мен ағаштарды бейнелей келе, анасына деген махаббаты жайында айтты. Ал 7 жасар Алма Бас қаламыздың негізгі символдарын бейнелеген болатын», - делінген хабарламада.

Конкурстық комиссия әр түрлі жас мөлшері бойынша жеңімпаздарды анықтады: Шагирова Назерке (5 жас), Спанова Фариза (6 жас), Ескербекова Алма (7 жас), Абужүсіп Дархан (9 жас), Қайрулла Алма (10 жас).

Шара соңында Департаменттің Әйелдер кеңесінің мүшесі Н.Р.Смык белсенді қатысушыларға алғысын білдіріп, балаларға зор денсаулық тілеп, нағыз патриоттар өсіп келе жатқанына сенім білдірді.

Конкурсқа қатысушы барлық балаларға естелік сыйлықтар мен тәтті сыйлықтар табыс етілді.

Барлық жаңалықтар