СҚО-да ИИДМБ аясында «Ростан» май зауытының жаңа буып-түю лентасы шығарыла бастады

Аймақ әкімдігінің хабарлауынша, аталмыш компания өзі шығаратын өнім көлемін ұлғайту бағытында Индустрияландыру картасының екінші бесжылдығына енгізілді. «Буу цехы үшін арнайы бөлме бөлініп, ол жөндеуден өтіп, дайындалды. Буу үшін қажетті құрылғы Ресейден әкелінді, құны 6 миллион теңге тұрады. Жаңа құрылғы минутына 10-нан 20 келіге дейінгі майды буып-түюге мүмкіндік береді. Сонымен қатар биылғы жылы компания майға арналған гемогенизатор сатып алды»,-делінген хабарламада.  

«Ростан» компаниясының директоры Владимир Ростовщиков биылғы жылы компанияның Ресейдйің Владивосток қаласына 150 тонна ірімшік экспорттауды жоспарлап отырғандығын айтты.

«Ростан» компаниясының зауыты бұрынғы май зауытының орнында іске қосылған. Онда бірнеше жыл қатарынан қайта жөндеу жұмыстары жүргізіліп, жөндеу жұмыстары мен жаңғырту шаралары іске асырылды. Компанияның өнімдері сертификатталған. Кәсіпорын 7 түрлі сүт өнімін шығарады және олар Қазақстанда ғана емес, Ресейде де саудаланады.