Танкі биатлонынан өтетін әлем чемпионатына ҚР ҚК-нен қатысушылар анықталды (ФОТО)

«Шараның мақсаты ҚР ҚК-нің Құрлықтағы әскерінің ең үздік деген танк экипаждарын анықтап, биылғы жылдың тамыз айында Ресейдің Мәскеу маңындағы «Алабино»  полигонында танк биатлонынан өтетін әлем чемпионатына қатысушыларды іріктеу болатын»,-деп хабарлады Қорғаныс министрлігі.

Жарысқа «Оңтүстік», «Батыс», «Шығыс» аймақтық қолбасшылықтары мен ҚР ҚК Аэроұтқыр әскерлері сияқты құрлық әскерлерінен тұратын 4 командадан ең үздік деген 12 танк экипаждары қатысты. Жарыс жеке жарыс және эстафета сияқты екі түрде екі күн қатарынан жалғасты. Осы екі кезеңнің қорытындысы бойынша әділқазылар алқасы жарыстың нәтижелерін шығарды. Танктер бірінен-соң бірі тіз қатар тұрып, өзара би биледі. Салмағы 40 тонна болатын әскери машиналардың бір мезгілде бірдей қозғалғандағы көрініс пен гүрілдеген дыбыстар ешкімді де бей-жай қалдырмағаны анық.      

Нәтижесінде, бірінші орынды Асылбек Мұсұрманқұловтың танк экипажы (10810 ә/б, «Шығыс» ӨҚ)  жеңіп алса, екінші орын лейтенант Еламан Әбішевтің экипажына (10810 ә/б, «Шығыс» ӨҚ) бұйырды. Ал, үшінші орынды Қанат Нәбидің танк экипажы  (21450 ә/б «Оңтүстік» ӨҚ) місе тұтты. Жеңімпаздар медаль, диплом және құнды сыйлықтармен марапатталды. Үздік танк экипажына Т-72 маркілі танкінің алтын макеті тапсырылды. Бұған қоса, жарыс қорытындысы бойынша 6 үздік танк экипаждары таңдап алынды. Олардың 4-уі Ресейде өтетін чемпионатқа қатысады.

Айта кететін мәселе, өткен жылғымен салыстырғанда, бұл жол танк экипаждарының біліктілігі мен кәсіби деңгейлерінің айтарлықтай өскендіктері көрініп тұр.