Қазақстанда Bala Turkvizyon-2015 халықаралық байқауына іріктеу басталды

28 Мамыр, 2015 15:23

Әлия Назарбаеваның «Жандану әлемі» қоры мен Ұлт Көшбасшысы – Қазақстан Республикасының Тұңғыш Президенті қорының қолдауымен Қазақстанда қазіргі түркітілдес елдердің тарихында алғаш рет болып отырған Bala Turkvizyon-2015 Халықаралық балалардың ән байқауы жарияланды.

«Қордың қызметінің негізгі бағыттарының бірі шығармашыл жастарды қолдау. Біздің барлығымыз да балаларымыздың жетістікке жеткендерін қалаймыз. Bala Turkvizyon-2015 байқауы – өзіңнің дарыныңды әлемге танытудың тамаша жолы. Біз қордың Қазақстанның барлық аймақтарындағы дарынды балаларына тағы да қолдау көрсететінін мақтан етеміз»,-деді Тұңғыш Президент қорының атқарушы директоры Сағындық Нұраханов Алматыдағы ОКҚ-де өткен баспасөз мәслихатында.

«Bala Turkvizyon-2015» байқауына 8 бен 13 жас аралығындағы ұл-қыздар қатыса алады. Ұлттық кезеңнің басты сыйлығы Түркменстанның Мары қаласында күзде өтетін Bala Turkvizyon-2015 Халықаралық балалар ән байқауының гранд-мәресі.

Ұйымдастырушылардың айтуларынша, Қазақстандағы «Bala Turkvizyon-2015» байқауына еліміздің қай аймағында тұратындығына қарамастан кез-келген жас қатыса алады. Әр аймақтан көпбалалы, әлеуметтік жағынан аз қамтылған отбасынан шыққан 3 дарынды жас анықталады және олар Тұңғыш Президент қорының сыйлығының иегері атанады.

Халықаралық жоба 2015 жылдың 30-мамырында Алматыда салтанатты жағдайда жарияланады, ал 8-маусым мен 1-тамыз аралығында бүкіл Қазақстан бойынша байқауға қатысушыларды іріктеу сайыстары өтеді. Жалпы алғанда, байқау еліміздің барлық аймақтарындағы дарынды жастарды анықтаумен оларға қолдау көрсету арылы түркітілдес елдерді біріктіруді көздейді.

Ботагөз Айтжанова

Барлық жаңалықтар