Г.Әбдіхалықова: Патриотизм мен халықтың бірлігі - бес институционалдық реформаны іске асырудың маңызды факторы
Отырысты ашқан Мемлекеттік хатшы қазақстандық патриотизм мен халықтың бірлігі Мемлекет басшысы Нұрсұлтан Әбішұлы Назарбаев ұсынған Бес институционалдық реформаны кезең-кезеңімен іске асырудың және «100 нақты қадамды» өмірге табысты енгізудің маңызды факторы екенін атап өтті. Гүлшара Әбдіқалықова қазақстандық патриотизм ең әуелі Отанға деген сүйіспеншіліктен және оның мемлекеттік рәміздеріне деген құрметпен тәрбиеленетінін атап көрсетті.
Комиссия отырысында Қазақстан Республикасы Қорғаныс, Денсаулық сақтау және әлеуметтік даму министрліктерінің, сондай-ақ, Астана қаласы және Атырау облысы әкімдерінің мемлекеттік рәміздерді пайдалану және насихаттау жөніндегі жұмыстары туралы есептері тыңдалды. Аталған орталық және жергілікті мемлекеттік органдардың осы маңызды идеологиялық саладағы жұмысына жан-жақты әрі терең талдау жасалды.
Мемлекеттік хатшы Г.Н.Әбдіқалықова уәкілетті мемлекеттік органдардың басшыларының назарына мемлекеттік рәміздер туралы заңнамалардың бұзылуына жол бермеу, ішкі бақылауды ұдайы қамтамасыз ету, құқық қолдану тәжірибесін жетілдіру, сондай-ақ мемлекеттік рәміздерді қолдану және насихаттау саласына бақылауды күшейту мәселелеріне тоқталды.
Отырыс қорытындысы бойынша нақты тапсырмалар мен ұсынымдар берілді.
