Қазақ хандығының 550 жылдығына орай Талдықорғанда сәулеттік композиция қойылады (ФОТО)

25 Мамыр, 2015 08:54

Қазақ хандығының 550 жылдығына орай Талдықорған қаласындағы Еркін айналма жолында биіктігі 40 метр болатын, Қазақстан Дизайнерлер одағының президенті Тимур Сүлейменов дайындаған сәулеттік композиция қою жоспарланған. Бұл туралы Алматы облысының әкімі Амандық Баталовтың қаланы аралау барысында мәлім болды, деп хабарлады Алматы облысы әкімдігінің баспасөз қызметі.

Жоба авторы Т.Сүлейменовтің айтуынша, негізгі кеңістіктік конструкция композициялық тұрғыдан бірнеше саладан тұрады, ал оны айнала 12 стелла қоршап тұрмақ. Орталық стелланың түсі тұрақты түрде өзгеріп отырады. Осы мақсат үшін арнайы жарықдиодты жүйе қолданылмақ. Сонымен қатар конструкцияның жанына субұрқақ орнатылып, онда 550 ағыс су бүркіп тұрады.

Жобаның соңғы эскизімен және оны жүзеге асыру жоспарымен танысқан өңір басшысы жаңа сәулеттік нысанды орнату жоспарындағы материалдарға назар аударды.

«Идея өте қызықты, ал оны жүзеге асыру қаламыздың ажарын ашып, эстетикалық келбетін әдемілей түседі. Оны орнату барысында жоғары сапалы, таттануға және басқа да табиғи әсерлерге қарсы тұра алатын, қайта-қайта сырлап, жаңартып тұруды қажет етпейтін берік металл қорытпасын пайдалануымыз керек», - деді облыс әкімі А. Баталов.

Барлық жаңалықтар