Қазақстан өкілі ДДҰ Атқарушы комитетінің мүшесі боп сайланды

25 Мамыр, 2015 08:37

Дүниежүзілік Денсаулық сақтау Ассамблеясының 68-ші сессиясында Құлжанов Мақсұт 2015 жылғы мамырдан 2018 жылғы мамырға дейінгі кезеңге Дүниежүзілік денсаулық сақтау ұйымының (ДДҰ) Атқарушы комитетінің мүшесі боп сайланды, деп хабарлады ҚР Денсаулық сақтау және әлеуметтік даму министрлігі.

Атқарушы комитеті ДДҰ-ның басқарушы органы боп табылады. Комитет отырыстарында әлемнің денсаулық сақтау саласының дамуына әсер ететін маңызды шешімдер қабыданады. ДДҰ Атқарушы комитеті ұйымның даму стратегиясын анықтап, ДДҰ Штаб-пәтерінің және алты өңірлік кеңсесінің қаржы, маман және техникалық саясатын басқарады.

«Дүниежүзілік Денсаулық сақтау Ассамблеясының басшылығы Қазақстан ДДҰ Атқарушы комитетінің жұмысына лайықты үлес қосатынын мәлімдеді», - делінген хабарламада.

Мақсұт Құлжанов – Қазақстанның қоғамдық денсаулық сақтау мектебінің негізін қалаушы. Мұндай ұйым Орталық Азия өңірінде ғана емес, бүкіл ТДМ аумағында алғашқы боп құрылды. М.Құлжанов аталған ұйымды 15 жыл басқарып, халықаралық деңгейде танылуына еңбек сіңірді. 1992-1997 жылдары ҚР Денсаулық сақтау вице-министрі қызметін атқарды. 200-ден астам ғылыми мақалалардың авторы. Дәріскер және денсаулық сақтау саласының зерттеуші ретінде бай тәжірибеге ие.

Барлық жаңалықтар