Т.Балықбаев: 2011 жылғы «Ғылым туралы» заң ҚР ғылым үдерісін белсендендірді

22 Мамыр, 2015 20:21

2011 жылы қабылданған ҚР «Ғылым туралы» заңы бүкіл республика бойынша ғылыми үдерісті белсендендірді, деді Білім және ғылым вице-министрі Такир Балықбаев VIII Астана экономикалық форумында.

«Қазақстандағы 2011 жылы қабылданған «Ғылым туралы» заңы бойынша ғылымды басқарудың жаңа үлгісін жүзеге асыруға бағытталған соңғы жылдардағы жүйелі өзгерістер бірінші кезекте, ғылыми қызметті қаржыландырудың құрылымына жаңа өзгерістер енгізуге мүмкіндік берді. Бұл өз кезегінде республика көлемінде алғанда ғылыми үдерісті белсендендірді»,-деді Т.Балықбаев.

Оның сөзінше, қабылданған заң қазақстандық ғалымдардың жарияланымдарының журналдарда жарық көруін 3 есеге арттырды.

«Соңғы жылдары ғылымға жастардың келуі мен олардың ғылыми әлеуеттерінің артуы байқалады. Қабылданған заң қазақстандық ғалымдардың рейтингтік журналдардағы халықаралық жарияланымдарының санының айтарлықтай артуына негіз болды. 2011-2014 жылдар аралығында ғылыми жарияланымдардың саны 3 есеге артып, 984-тен 2 мың 783-ке дейін жетті»,-деді ол.

Естеріңізге сала кетейік, 21-22 мамыр аралығында VIII Астана экономикалық форумы өтіп, оған әлемнің 90 мемлекетінің саяси, сарапшылық және іскер топтарынан 3 мыңға жуық адам қатысты.

Анар Тәңірқұлова

Барлық жаңалықтар