Р.Сарсембаева: «Нұрлы жол» - әр қазақстандықтың өмір сүру сапасын арттыру бойынша мемлекеттің жол картасы

21 Мамыр, 2015 18:53

«Нұрлы жол» - әр қазақстандықтың өмір сүру сапасын арттыру бойынша мемлекеттің жол картасы, деп хабарлады ҚР Президенті жанындағы әйелдер істері және отбасылық-демографиялық саясат жөніндегі комиссияның мүшесі, Қазақстанның іскер әйелдер қауымдастығының президенті Раушан Сарсембаева VIII Астана экономикалық форумы барысында.

«Нұрлы жол» - ол 2050 жылға дейін мемлекеттің даму бағдарламасы деуге болады. Бұл әр қазақстандықтың өмір сүру сапасын арттыру бойынша мемлекеттің өзіндік жол картасы іспетті. Жолдауда шағын және орта бизнестің ролі, оған көрсетілетін қолдау атап көрсетілген. Жасыратыны жоқ, бізде шағын бизнеспен көбіне әйелдер қауымы айналысады», - деді ол.

Оның айтуынша, бүгінде Қазақстанда әр екінші кәсіпкер – әйел.

«Соңғы оңжылдықта кәсіпкер әйелдердің санының артуын сарапшылар тыныш революция деп атайды. Олар көбіне қызмет көрсету, сауда, тамақтану, білім беру мен денсаулық сақтау салаларында қызмет етуде», - деді Р.Сарсембаева.

Осы ретте, ол атап өткендей, өндіріс саласындағы әйелдер саны санаулы, бар жоғы 5 %, алайда бұл сан күн санап өсуде.

Анар Тәңірқұлова