Г.Греф: ҚТЖ мен РФ Сбербанкі бірлескен жобаны жүзеге асырады

21 Мамыр, 2015 15:36

«Қазақстан темір жолы» Ресейдің Сбербанкімен Ақтау айлағын кеңейту жөніндегі бірлескен жобаны жүзеге асырмақшы. Ресейлік банк аталмыш жобаға 200 миллион доллар салғалы отыр, деді Ресейдің Сбербанкінің Президенті және Басқарма төрағасы Герман Греф VIII Астана экономикалық форумында.

«ҚТЖ біздің жақын әріптесіміз және ең мықты клиенттеріміздің бірі. Біз ҚТЖ-мен бірлесіп қолға алған жобалар алдын ала белгіленген жоспарға сай жүзеге асырылуда. Бізде олардың несиелерімен жұмыс бойынша ешқандай да ескертулеріміз жоқ. Біз ҚТЖ президентімен тек жаңа жобаларды талқылау үшін ғана кездесеміз. Біз жуық арада бірлескен жобаны қолға аламыз деп келістік, ол Атырау айлағын кеңейту, аталмыш жобаға біз 200 миллион доллардан астам несие береміз. Бұл жоба белгіленген кестеге сай жүзеге асырылуда. Бізге ҚТЖ сияқты клиенттер керек-ақ»,-деді Г.Греф.

Естеріңізге сала кетейік, Қазақстан Республикасы жанындағы Шетелдік инвесторлар кеңесінің 27-ші пленарлық мәжілісінің аясында «Қазақстан темір жолы» ұлттық компаниясының басшысы Асқар Мамин Ресейдің Сбербанкінің Президенті және Басқарма төрағасы Герман Греф пен «Сбербанк» АҚ-ның еншілес өкілдігінің Басқарма төрағасы Александр Камалов ынтымақтастық туралы меморандумға қол қойды.

Анар Тәңірқұлова

Барлық жаңалықтар