Қазақстанда VIII Астана экономикалық форумы жұмысын бастады

21-22 мамыр аралығында екі күн бойына 30 іс-шара өткізу жоспарланған.

Қаланы 2030 жылға дейінгі дамытудың 3D-симуляторының таныстырылымы болады. Форумда әлемдік экономиканың болашағы, мұнай бағасының құлдырауы жағдайында қолға алынуы тиіс шаралар мен тұрақты өсім мәселелері сөз болады. Сондай-ақ жиындағы маңызды шаралардың бірі елімізге жаңа ауқымды инвестициялар тартуға бағытталған инвестициялық форум болмақ.   

Айта кететін мәселе, Астана экономикалық форумында жылда ірі келісім-шарттар мен келісімдер  жасалады. Биылғы, 2015 жылғы форумда да инвесторларды тарту үшін көптеген ұсыныстар мен кешенді шаралар қарастырылған.     

Форум жұмысына әйгілі саясаткерлер, қазіргі және бұрынғы мемлекет пен үкімет басшылары, ірі қаржылық даму ұйымдары мен трансұлттық компаниялардың жетекшілері қатысады деп күтілуде. Астана экономикалық форумы – Қазақстан астанасындағы халықаралық және аймақтық пікірталас платформасы болып табылады. Ол жыл сайын ұйымдастырылады.   

Жалпы алғанда, Астана экономикалық форумы кәсіпорындардың атқарушы директорларын, саясаткерлерді, журналистер мен ғалым, Нобель сыйлығының лауреаттарын қоса алғанда, мемлекеттердің делегацияларынан 10 мыңнан астам адам қатысады деп күтілуде. Астана экономикалық форумы әлемдегі халықаралық форумдардың ішіндегі ең ірілерінің бірі.     

Индира Кауметова