«Достастық жауынгері» байқауына қатысу үшін ҚР ҚК әскери қызметшілерін іріктеу басталды (ФОТО)

Іріктеу кезеңі ағымдағы жылдың 18-20 мамыр аралығында, достас армиялар әскери қызметшілерінің арасындағы әскери-кәсіби шеберлікті анықтау мақсатында өткізіледі.

«Біздің Ұлы Жеңіске қосқан үлесіміз!» атты ұранмен өтетін сайыс бірнеше  әскери-кәсіби жарыстардан тұрады. Атап айтсақ, «Кәсіпқой» – сайысында байқауға қатысушының даярлығы, АРД кедергі жолағынан өтуімен, ал «Атлет» сайысы – дене даярлығы бойынша көрсеткіштерді тапсыруымен (бірыңғай кедергі жолағын игеру, белағашта біріктірілген күштік жаттығуларды игеру, 100 және 3000 метрге жүгіру, дәлдікке гранат лақтыру), «Мерген» оқ ату даярлығы – атыс жаттығуларын құрайды (қаруды қалыпты атыс жағдайына келтіру, 4 УКС және АК-3 спорттық жаттығуларды орындау), сондай-ақ әскери тарих туралы және «Эрудит» халықаралық гуманитарлық құқықтың тағлымдары мен нормалары туралы білімі бағаланады.

Ағымдағы жылдың маусым айында жарыстың жеңімпаздары ҚР Қарулы Күштерінің ауқымында өтетін байқауға қатысатын болады.

21750 әскери бөлімінің штаб-сержанты Руслан Жұбанышов осындай іс-шаралар әскери қызметшілердің жауынгерлік біліктілігін арттырып, дағдыларын дамытады, сондай-ақ кәсіби даярлау деңгейін жетілдіретінін атап өтті.

Естеріңізге сала кетейік, достас армиялар арасындағы әскери қызметшілердің әскери-кәсіби шеберлігін анықтайтын «Достастық жауынгері» халықаралық байқауы жыл сайын ТМД қатысушы мемлекеттердің Қорғаныс министрлер кеңесінің шешімі бойынша 2009 жылдан бері өткізіліп келеді. Қазақстандық әскери қызметшілер жыл сайын байқау барысында өздерінің жоғарғы даярлық деңгейін көрсетіп, бірнеше мәрте жалпы командалық сынақта үздік үштіктің құрамына енді.