KAZNEX INVEST литвалық кәсіпкерлермен 7 миллион доллардың меморандумына қол қойды

19 Мамыр, 2015 15:33

Қазақстандық-литвалық бизнес-форум барысында «KAZNEX INVEST» акционерлік қоғамы Литваның кәсіпкерлік және өнеркәсіп конфедерациялары мен агро-жылыжай кешенінің құрылысы саласындағы «Дурпета» жабық акционерлік қоғамымен, логистикалық орталықты дамыту жөніндегі «Eurofire» жабық акционерлік қоғамымен бірге өзара түсіністік жөніндегі меморандумға қол қойды.

«Меморандумдардың құны логистика саласы бойынша 5 миллион долларды, агросектор бойынша 2 миллион долларды құрайды. Литвалық кәсіпкерлер логистикалық орталық пен жылыжайларды дамытуды көздеп отыр, яғни келісім 7 миллион долларға жасалды. Компаниялар осы мүмкіндікті жан-жақты қарастырып, әріптестерді тауып, одан кейін келісім-шарт жасауға кіріседі»,-деді «KAZNEX INVEST» АҚ төрағасының орынбасары Әсел Ерғазиева.

«Біз Қазақстанның логистикасына бірінші кезеңде 5 миллион доллар салуға дайынбыз. Ал жылыжайға келетін болсақ, бұл бағытта Алматы өңірін қарастырып отырмыз. Біз қазақстандық нарықпен 10 жылдан астам уақыт бойы жұмыс істеп келеміз»,-деді «Baltic Logistics Group» ЖАҚ Бас менеджері Йонас Кондратас.

Айта кететін мәселе 2005-2014 жылдар аралығында Литвадан келген тікелей инвестициялардың жалпы көлемі 9,5 миллион АҚШ долларын құрады. Осы уақыт аралығында Қазақстаннан Литваға жөнелтілген тікелей инвестициялардың жалпы көлемі 9,9 миллион АҚШ долларын құраған.

Естеріңізге сала кетейік, бүгін Астанада қазақстандық-литвалық бизнес форум өтіп жатыр. Форумға екі мемлекеттің кәсіпорындары мен ұйымдарынан, даму институттары мен бизнес бірлестіктерінен және мемлекеттік органдарынан 200-ден астам адам қатысуда

Индира Кауметова

Барлық жаңалықтар