• Басты
  • Қазақстанда көктемгі әскер қатарына шақыру науқаны аяқталуда
19 Мамыр, 2015 20:46

Қазақстанда көктемгі әскер қатарына шақыру науқаны аяқталуда

2015 жылғы көктемгі әскерге шақыру науқаны аяқталуға жақын. Қазіргі кезде Алматы қаласынан, Алматы, Ақтөбе, Атырау, Шығыс Қазақстан, Жамбыл, Батыс Қазақстан, Қарағанды, Маңғыстау, Павлодар және Солтүстік Қазақстан облыстарынан әскер қатарына шақырылғандар әскери борыштарын өтейтін бөлімдерге жөнелтілді.
Қазақстанда көктемгі әскер қатарына шақыру науқаны аяқталуда

Қорғаныс министрлігінде хабарлағандай, 24 мамырға дейін елордада, сондай-ақ Ақмола, Оңтүстік Қазақстан, Павлодар, Қостанай және Қызылорда облыстарының орталықтарында әскерге жаңа шақырылғандарды салтанатты түрде шығарып салу рәсімдері өтеді.

Болашақ сарбаздарды Ұлы Отан соғысының ардагерлері, Ауған соғысына қатысушылар және жауынгер интернационалистер, жоғарғы және арнаулы орта оқу орындарының студенттері, әскери-патриоттық клубтар мен мектептердің тәрбиеленушілері шығарып салады.

Жастар үшін бұл толғанысқа толы жауапты сәт. Әскери антты қабылдағаннан кейін олар ресми түрде Қазақстан Республикасы Қарулы Күштерінің қатарына кіреді. Бір жыл бойы оқ ату, саптық, дене, кәсіби даярлықтардан өтіп, қару-жарақ пен әскери техниканы меңгереді.

Естеріңізге сала кетсек, көктемгі әскерге шақыру науқаны сәуірде басталды. Мерзімді әскери қызметке шақыру аясында барлығы 15 мың жас әскерге шақырылатын болады. Ағымдағы жылы Қазақстан Республикасы Қарулы Күштерінің, басқа әскерлері мен құралымдарының қатарын 30 мың әскерге шақырылушы толықтырады.

 

Барлық жаңалықтар