«Нұр Отан» партиясының жаңа Доктринасы «Қазақстан-2050» Стратегиясының іске асырылуындағы өзіндік рөлін айқындайды

Мәжiлiске жұмыс тобының мүшелерi, ҚР Парламентi депутаттары, орталық және жергiлiктi мемлекеттiк орган басшылары, зиялы қауым өкiлдерi, ғалымдар мен сарапшылар қатысты. 

«Бiз жыл басынан берi партия төрағасы, Мемлекет басшысы Нұрсұлтан Назарбаевтың тапсырмасы бойынша осы доктрина жобасын әзiрлей бастадық. Өздерiңiз бiлетiндей, үкiмет мүшелерi, саяси кеңес бюросының мүшелерi, «Нұр Отан» фракциясының мүшелерi аймақтарға шығып, осы Доктринаны кеңiнен талқылады. Нәтижесiнде, бiздiң аппаратқа көптеген ұсыныстар келiп түстi. Бұл саяси Доктрина болашаққа арналан құжат. Ол бiздiң партиямыздың ХХI ғасырдағы миссиясын және «Қазақстан - 2050» стратегиясын жзеге асырудағы рөлiн айқындайды», - дедi «Нұр Отан» ХДП төрағасының бiрiншi орынбасары Бауыржан Байбек. 

Ол партияның басты үш құжаты – тұғырнамасы, бағдарламасы және доктринасы болатынын атап өттi. 

«Тұғырнама – партияның бiр сайлау мерзiмiне арналған басымдықтары айқындалған негiзгi құжат. Бағдарламада партияның жаңа басымдықтары жазылып, оның он жылдық қызметiне бағытталады. Ал Доктринада партияның мақсат-мұраты мен құндылықтары алдағы бiрнеше онжылдықтарға арналып жазылатын болады», - дедi Б.Байбек. 

Еске сала кетсек, аталған құжатты дайындау кезiнде шетелдiк жетекшi партиялардың ұқсас партиялық құжаттарының үлгiлерi қолданылды. Жұмыс тобының алда өткен үш мәжiлiсiнде Доктрина жобасы талқыланған болатын. Доктрина әзiрлеудiң соңғы кезеңiнде оның қазақтiлдi мәтiнiн жетiлдiру үшiн арнайы Редакциялық топ құрылды.