ШҚО-ның барлық мұражайларында «Мұражай түні» онкүндігі ашылды
Акцияның негізгі мақсаты – тірлік қамымен күндіз келуге бос уақыты болмаған адамдарды мұражайға тарту, тарихи және мәдени құндылықтар туралы терең мағлұмат беріп, жастардың танымын кеңейту. Шара аясында Қазақ Хандығының 550 жылдығына орай, ел іргесін бекіткен хандар мен сұлтандардың, батырлардың өмірі, мұралары жайында ақпараттандыру кең ауқымда жүзеге асырылмақ. Келем деушілерге түнгі 23.00-ге дейін мұражайлардың есігі ашық.
ШҚО Мәдениет басқармасынан хабарлағандай, акцияға Өскемен қаласынан Облыстық өнер мұражайы, облыстық тарихи-өлкетану мұражайы, Семейден Облыстық Достоевскийдің әдеби-мемориалдық мұражайы сынды ірі ошақтардың қызметкерлері бір-біріне экскурсияға барып, тәжірибе алмасады.
Мұражайға келем деуші жұртшылыққа экскурсиямен қатар, мәдени орындарда арнайы концерттік бағдарламалар ұсынылмақ. Мәселен, облыс орталығындағы Облыстық өнер мұражайында суретші және спортшы Вадим Салманханов аэрографиядан шеберлік сыныбын өткізіп, спорттық билер мен спорттық әндер орындалатын кеш ұйымдастырылады.
