ҰБТ нәтижелерін 2015 жылы ЖСН арқылы ғана білуге болады

15 Мамыр, 2015 13:09

Ұлттық бірыңғай тестілеу балдарына қарасты ақпараттарды биылғы жылы Ұлттық тестілеу орталығының сайтынан жеке сәйкестендірілген нөмірі арқылы ғана білуге болады, деді Білім және ғылым министрлігінің Білім беру мен ғылым саласын қадағалау комитетінің төрағасы Саят Нүсіпов Орталық коммуникациялар қызметінде өткен баспасөз мәслихатында.

«Биылғы жылы өзгерістер енгізіліп, мектеп бітіруші түлектердің аты-жөндері мен олардың тест нәтижелері бұрынғыдай ілінбейді. Олар жеке сәйкестендірілген нөмірлермен алмастырылады, сондай-ақ тест тапсырушының жеке сәйкестендірілген нөмірлері пайдаланылады және олар тест тапсырардың алдында беріледі»,-деді С.Нүсіпов.

Комитет төрағасының сөзінше, бүкіл әлемде тест тапсырмаларының нәтижелері жеке адамға ғана тиесілі болады да құпия сақталады.

«Бұл түлектердің де, ата-аналардың да, ұстаздардың да талап-тілектері, өйткені тест нәтижелерін ілу көпшілік арасында үлкен дүрбелең тудырады. Біреу оқып, білім алады, екіншісі оның жанында отырып, түк бітірмеген болып көрінгенімен тестті жақсы тапсырып, жақсы ұпай жинаған болып тұрады. Бұл оқушылар арасында үлкен қобалжулық тудырады»,-деді комитет төрағасы.

Етеріңізге сала кетейік, ҰБТ туралы мәліметтер тек Ұлттық тестілеу орталығының сайтында және емтихан тапсыру басталғаннан кейін сағат 15-00-де ғана қолжетімді болады.

Анар Тәңірқұлова

Барлық жаңалықтар