• Басты
  • Астанада «Қазақ халқының салт-дәстүрлері» кітабы таныстырылды (Фото)

Астанада «Қазақ халқының салт-дәстүрлері» кітабы таныстырылды (Фото)

15 Мамыр, 2015 20:43
Қазақстан Республикасының Тұңғыш Президенті – Елбасы кітапханасында қазақстандық белгілі суретші-график Ералы Оспанұлының «Қазақ халқының салт-дәстүрлері» кітабының таныстырылымы өтті, деп хабарлады Тұңғыш Президент кітапханасы.

«Біздің мекемеміз Елбасы кітапханасы болғандықтан, руханиятты қолдау іс-шараларына ерекше мән береміз. Технологияның қарыштап дамыған, жаппай жаһандану заманында ұлттық нақыштағы шығармашылық өкілдері назардан тыс қалмауы тиіс. Өйткені олар біздің қаншама ғасырлық төл өркениетіміз, мәдениетіміз, дүниетанымымыз болғанын өзгелерге де, өзімізге де мұқият таныстырады. Келер ұрпақ осы еңбектер негізінде сабақтастығымызды сақтай алады. Бұл бағытта «Қазақ халқының салт-дәстүрлері» сынды еңбектердің маңызы зор», - деді «Қазақстан Республикасының Тұңғыш Президенті – Елбасының кітапханасы» ММ атқарушы директоры Бейсембай Жұмабеков.

Бұл – толықтырылып екінші рет басылып отырған кітап. Оған қазақтардың дәстүрлі әдет-ғұрыптарына қатысты 90 сурет енгізілді. Графикалық туындылардың әрқайсысына қысқаша сипаттамасы қоса берілген. Онда көрсетілген салт көшпелі халық үшін қаншалықты маңызды екені жазылады.

Тұсаукесер шарасына мемлекет қайраткерлері, дипломатиялық қызмет өкілдері, руханият қайраткерлері, меценаттар мен кәсіпкерлер қатысты. Көпшілікті автордың бұған дейін де жоғары бағаланып үлгерген ұлттық нақыштағы шығармалары айрықша қызықтырды.

«Қазақ халқының салт-дәстүрлері» кітабының жарық көруіне ORDA INVEST инвестициялық-құрылыс корпорациясы қаржылай қолдау көрсеткен.

Барлық жаңалықтар