• Басты
  • Қазақстанда ЖҚЖК бойынша 121 мың адам кәсіптік білім алды – вице-министр

Қазақстанда ЖҚЖК бойынша 121 мың адам кәсіптік білім алды – вице-министр

14 Мамыр, 2015 13:54
«Жұмыспен қамтудың жол картасы-2020» бағдарламасының екінші бағыты бойынша 121 мың адам оқып шықты, оқуды аяқтаған 105 мың адамның 87 пайызы жұмыспен қамтылды, деді ОКҚ баспасөз конференциясында ҚР денсаулық сақтау және әлеуметтік даму вице-министрі Дәулет Арғандықов.

«Бағдарламаның екінші бағыты бойынша екі компонент бойынша өндірістік қызмет тұрақты дамуда. Біріншісі – оқу мен жұмысқа орналасу, екіншісі  - еңбек ресурсының тиімділігін арттыру. Оқытуға келетін болсақ, ол үш бағыт бойынша жүзеге асады: кәсіптік даярлық, қайта даярлық, біліктілікті арттыру. Бағдарлама жұмыс істегелі бері 121 мың адам бізде оқыды, 105 аяқтап, оның 87 пайызы жұмысқа орналасты», - деді ол.

Вице-министрдің айтуынша, үшінші бағыт бойынша барлық мақсатты топтарға еңбекақыны субсидиялау қарастырылған.

«Бізде бұл қолдау 132,5 мың адамға көрсетілді, оның 67 пайызы тұрақты жұмысқа орналасты. Бұл шара жастар саясатында көрсетілді», - деді ол.

 Сондай-ақ, үшінші бағыт бойынша еңбек ресурстарының тиімділігі арттырылады.

«Адам аз шоғырланған аймақтан экономикалық әлеуеті жоғары аймаққа көшіру қарастырылады. Елде 6 мың жергілікті пункт бар, ол ауыз су, денсаулық сақтау, білім беру әлеуеті бойынша төмен әлеуетке ие. 2011-2014 жылдар аралығында 16,1 мың адам өз еркілерімен көшірілді, оның 2014 жылы көшкендері 3456 адамды құрады. Көшірілгендердің 7,8 мыңы жұмыс істеуге қабілетті, оның 6,1 мыңы жұмыспен қамтылды», - деді ол.

Естеріңізге сала кетейік, «Жұмыспен қамтудың жол картасы - 2020» бағдарламасы үш бағыт бойынша жүзеге асырылады, олар: инфрақұрылымдық және тұрғын үй коммуналдық шаруашылық  жобаларында жұмыспен қамту, кәсіпкерлік бастамаларға қолдау көрсету, тұрғылықты жерін ауыстыру арқылы жұмыспен қамту.

Анара Тәңірқұлова

Барлық жаңалықтар