Мадридте «Қазақстанның инвестициялық ахуалы» атты экономикалық конференция өтті

14 Мамыр, 2015 15:37

Қазақстан Республикасының Мадридтегі Елшілігінде «Қазақстанның инвестициялық ахуалы» атты экономикалық конференция өтті. Конференцияға испан тарапынан экономиканың әртүрлі секторларында жұмылдырылғын испандық жетекші компанияларының басшылары мен өкілдері қатысты. Іс-шараға, сонымен қатар, Испания Парламентінің Сенаторы Хосе Мария Чикильо Барбер қатысты, деп хабарлады ҚР СІМ.

Қазақстан Елшісі Бақыт Дүйсенбаев шара қатысушыларын еліміздің маңызды жетістіктері, Президент Нұрсұлтан Назарбаев бастамасымен жүргізілген саяси және экономикалық реформалар, жетекші халықаралық рейтинг агенттіктердің елдің экономикалық дамуына жоғары баға беруі, Қазақстандағы қолайлы инвестициялық климат туралы хабардар етті.

Конференция испандық кәсіпкерлер тарапынан зор қызығушылық тудырды, олар өз сөздерінде Қазақстанда жұмыс жасауға мүдделілігін білдіріп, ҚР саяси жүйесінің тұрақтылығы, республикада бизнес жасауға инвестициялық ахуалдың қолайлылығы және халықаралық ірі компаниялардың жұмыс істеуі жайлы хабардар екенін танытты. Олар Қазақстанның инвестициялау, бірлескен кәсіпорындарды ұйымдастыру, қазақстандық әріптестермен бизнес жүргізу салаларындағы бүкіл өңірде ерекше ролін атап өтті.

Конференция қорытындылары бойынша жақын арада Қазақстанға испандық компаниялардың миссиясын ұйымдастыру туралы уағдаластыққа қол жеткізілді.