Өскеменде ШҚО мен Бельгия Корольдігінің арасындағы ынтымақтастық талқыланды

14 Мамыр, 2015 09:57

Өскеменде өткен аймақ басшысы Даниал Ахметовпен Белгия Корольдігінің ҚР-дағы Төтенше және Уәкілетті елшісі Мишел Петерменстің кездесуі барысында ШҚО мен Бельгия Корольдігінің арасындағы ынтымақтастық, оның ішінде инновациялық технологиялар мен өндіріс салаларындағы серіктестік талқыланды, деп хабарлады ШҚО-ның Ақпараттық орталығы.

«Шығыс Қазақстан атом индустриясы дамып келе жатқан еліміздің өндірістік аймағы. Мұнда инновациялық кәсіпорындар табысты жұмыс істеп келеді. Автомобиль өндірісі бір жолға қойылған. Біз белгиялық тарапппен инновациялық технологиялар, ауыл шаруашылығы, тамақ өндірісі салаларында серіктестік орнатқымыз келеді», - деді Д. Ахметов.

Белгия елшісі Шығыс Қазақстанға сапары аясында Өскеменнің бірқатар кәсіпорындары мен ғылыми - білім беру мекемелерін аралады. Сонымен қатар, ШҚО-ның Кәсіпкерлер палатасының және «Ертіс ӘКК»ҰК»АҚ жанындағы Инвесторларға қолдау көрсету орталығының өкілдерімен кездесті.

Мишель Петерманс қонақжайлылығы үшін алғыс айтып, Белгияның ынтымақтастық кеңістігін кеңейтуге әзір екенін жеткізді.

Айта кетерлік жайт, Белгия экономикасы әртараптандырылған және көбіне ШОБ пен инновацияға иек артады.

ШҚО-мен Белгия арасындағы ынтымақтастық 2010 жылы қол қойылған меморандум аясында жүзеге асуда. Оның мақсаты мәдениет, ғылым, техника мен ядролық энергетика салаларындағы ұзақмерзімді тауарлар мен экономикалық қарым-қатынастарға серпін беру.

Барлық жаңалықтар