• Басты
  • Ақмолалық оқушылардың ғылыми жобалары Мәскеуде өткен халықаралық байқауда үздік деп танылды
13 Мамыр, 2015 11:41

Ақмолалық оқушылардың ғылыми жобалары Мәскеуде өткен халықаралық байқауда үздік деп танылды

Ақмолалық оқушылардың ғылыми жобалары «Математика және жобалау» атты VIII халықаралық байқауда бірінші орынды алды, деп хабарлайды Ақмола облысының ішкі саясат басқармасына қарасты «Ақмола Медиа Орталығы».
Ақмолалық оқушылардың ғылыми жобалары Мәскеуде өткен халықаралық байқауда үздік деп танылды

Жалпыға бірдей білім беру мектептерінің 7-11 сынып оқушылары мен орта кәсіби білім беру орындарының арасында «Математика және жобалау» атты халықаралық байқау ұйымдастырылып, шара Мәскеудегі Әлеуметтік басқару академиясының базасында өтті.  Оған Қазақстан, Болгария, Ресей мемлекеттерінің өкілдері қатысты.    

Интеллектуалды байқау дарынды оқушыларды анықтап, олардың өсіп-өркендуі мен дамуы үшін жағдайлар жасау болып табылады. Байқау екі кезеңнен тұрады: ұлттық және халықаралық. Жас ғалымдар онда «Қоғам мен табиғаттағы нақты үдерістердің математикалық үлгілері», «Геометриялық миниатюралар», «Математика мен өнер», «Математика ғылымы», «Электронды тақырыптық журнал», «Кәсіби мақсатты міндеттерді шешу үшін математикалық тәсілдерді қолдану» сияқты аталымдар бойынша өздерінің еңбектерін қорғады.   

Онда Қазақстаннан барлығы 195 ғылыми-зерттеу жобалары ұсынылған болатын, оның 6-уы Ақмола облысының оқушыларынікі. «Қоғам мен табиғаттағы нақты үдерістердің математикалық үлгілері» аталымы бойынша Бурабай ауданының Шортанды қаласының мектеп-интернатының 9 сынып оқушысы Маргарита Козиктің «Фибоначчи сандары табиғатта» атты еңбегі бірінші орынды жеңіп алды.   

Целиноград ауданының Қараөткел ауылының №6 орта мектебінің 11 сынып оқушысы Бахтияр Рахметовтың «Математика және өнер» жобасы да 1-ші орынға лайықты деп табылды.

Байқаудың жабылу рәсімінде байқауға қатысушылар болгар және қазақ әндерін шырқап, өздері жазған  өлеңдерді оқып, би билеп, шараның жабылу рәсімін есте қаларлықтай етіп өткізді.  

 

 

 

Барлық жаңалықтар