ЕЭК ЕАЭО-ның сауда-экономикалық ынтымақтастығын дамыту туралы Қытаймен келіссөздерді бастайды

13 Мамыр, 2015 14:47

Мәскеуде Еуразиялық экономикалық комиссияның сауда жөніндегі Коллегия Мүшесі (Министр) Андрей Слепнев және Қытай Халық Республикасының коммерция Министрі Гао Хучен Еуразиялық Экономикалық Одақ пен Қытай Халық Республикасы арасындағы сауда-экономикалық ынтымақтастық жөніндегі келісім бойынша келіссөздердің басталғаны туралы мәлім етті. Аталмыш ортақ мәлімдемеге 8 мамырда Мәскеуде қол қойылды, делінген ЕЭК ресми порталындағы жарияланымда.

Келісім базалық және барлығын тегіс қамти алатын сипатқа ие және ол ЕАЭО мен Қытай елдері арасындағы жан-жақты әріптестік пен экономикалық байланыстырды ары қарай дамытуға және тереңдетуге бағытталған.

«Біздің мақсатымыз кооперация жобаларын дамытудың ұзақ мерзімді болашағына, өндірістік және көліктік салаларға, инфрақұрылым мен қызмет көрсету саласына инвестициялар тарту үшін қолайлы жағдай жасайтындай келісімге қол қою. Ол үшін сауданы жеңілдетудің және ынталандырудың механизмдерін жасау, оның ашықтығы мен заңдылығын қамтамасыз ету, сондай-ақ ынтымақтастықтың барлық мәселелері бойынша өзара қарым-қатынастың тиімді институттарын құру керек», - деп атап өтті ЕЭК сауда министрі Андрей Слепнев.

Оның айтуынша, экономиканың нақты салаларында ынтымақтастықты дамыту бойынша жекелей келісімдер әзірлеу де қажет.