Қазақстанда маусым айында джиу-джитсудан Гран-при жарысы өтеді

12 Мамыр, 2015 12:36

Қазақстанда биылғы жылдың маусым айында джиу-джитсудан республикалық турнир өтеді, деді «Қазақстандық бразилиялық джиу-джитсу және греплинг федерациясы» республикалық қоғамдық бірлестігінің президенті, бразилиялық джиу-джитсудан ҚР бас бапкері Арманжан Рузахунов Орталық коммуникациялар қызметінде өткен баспасөз мәслихатында.

«Қазір біз әлем чемпионатынан кейін сәл кідіріп отырмыз. Маусымда өте үлкен Турнир Гран-при жарысын өткіземіз. Бұл бәсеке Қазақстан аумағындағы ең мықты деген жігіттерді іріктейді. Бізге қазір жігіттермен жағдайды нақтылап, ұлттық құраманың құрамын іріктеп алу керек»,-деді ол.

Бас бапкердің сөзінше, Қазақстанда өтетін жарыстан соң команда халықаралық жарыстарда өнер көрсетуді жалғастырады.

«Күзге таман жарыстар басталады. Нақтырақ айтқанда бұл Дубайда өтіп жатқан турнир болатын шығар. Бұл өте дәрежелі, атақты турнир. Біз осы бәсекеге қатысамыз»,-деді бапкер.

Естеріңізге сала кетейік, биылғы жылдың сәуір айында Қазақстанның бразилиялық джиу-джитсудан құрамында 78 адамы бар ұлттық құрамасы БАӘ Абу Даби қаласындағы әлем чемпионатында өнер көрсетті. Қазақстандық спортшылар 29 медаль жеңіп алды. Олардың арасында 9 медаль алтын, 10 медаль күміс және қола.

Анар Тәңірқұлова

Барлық жаңалықтар