ҮИИД: Ақтөбе облысында 5,2 мың жұмыс орнын ашатын 9 инвестициялық жоба іске асырылуда

Облыстың ішкі саясат басқармасы хабарлағандай, отырыста Ақтөбе облысының Индустрияландыру картасына енгізілген жалпы бағасы 691,1 млрд. теңгені құраған және 11,8 мың жұмыс орнын құруды көздеген 83 жобасының ішінде 5 жылдың ішінде (2010-2014 жж.) жалпы сомасы 547 млрд. теңгені құрап, 6,6 мың тұрақты жұмыс орны құрылған 74 жоба іске асырылғаны атап өтілді.

ҮИИД МБ-ның екінші бесжылдығының аясында 144,1 млрд. теңгені құрайтын, 5,2 мың жұмыс орнын құру көзделіп отырған 9 инвестициялық жобаны іске асыру жалғастырылмақ.

2015 жылы аймақта Индустрияландыру картасына бұған дейін енгізілген, жалпы сомасы 2,8 млрд. теңгені құрайтын, 300-ге жуық жұмыс орнын құруды көздеген екі жоба іске асырылып жатыр. Бұл «Игнадит» ЖШС-ның бастамасымен Хромтау ауданында қуаттылығы жылына 25 мың тонна әк өндірісі мен «АСБИ САТ ГРУПП» ЖШС зауытының Ақтөбе қаласында қуаттылығы жылына 520 мың дана темір-бетон шпалдарының өндірісі.

Жоғарыда аталған кәсіпорындардың басшылары нысандарды пайдалануға беру мерзімдері бойынша есеп берді.

Сондай-ақ Қазақстанның Индустрияландыру картасына енгізуге ұсынылып отырған жаңа инвестициялық жобалардың таныстырылымы өтті.

«Отырыс соңында Архимед Мұхамбетов облыс экономикасын сапалы жаңа деңгейге көтеріп және бұл негізде облыс тұрғындарының  әл-ауқатын арттыру, сол арқылы Мемлекет басшысы мен ҚР Үкіметінің тапсырмаларын орындау үшін индустриялық-инновациялық дамыту бағдарламасы бойынша бірқатар тапсырмалары мен кеңестерін берді», - делінген хабарламада.