Астанада ұлттық қауіпсіздік мәселесі жөнінде конференция өтті

12 Қазан, 2013 10:36

Астанада ҚР ҰҚК білім беру ғылыми-зерттеу институтының 10 жылдығына орай ұлттық қауіпсіздік мәселесі жөнінде «Қазақстанның ұлттық қауіпсіздігі: заманауи шақырулар мен қатерлер» атты конференция өтті, деп хабарлайды ведомствоның баспасөз қызметі.

Өзінің кіріспе сөзінде Ұлттық қауіпсіздік комитеті төрағасының бірінші орынбасары Владимир Жұмақанов мұндай ғылыми-зерттеу конференциясын өткізу Президенттің «Қазақстан 2050» Стратегиясы: қалыптасқан елдің жаңа саяси бағыты» Жолдауын жүзеге асыруда өте маңызды және дер кезінде атқарылған іс екенін айтты. Сонымен қатар, заманауи шақырулар мен қауіптерді анықтауда жүйелі зерттеуге арналған фундаменталды, қолданбалы және болжамдау-сараптау зерттеулерінің маңызын атады.

Шараға Парламент депутаттары, Қауіпсіздік кеңесінің өкілдері, алдыңғы қатарлы ғылыми-зерттеу институты ғалымдары мен жетекшілері қатысты. Баяндамаларда ең алдымен заманауи шақырулар мен қатерлердің дәрежелері мен қалыптасуы қарастырылды. Аймақтық және халықаралық қауіпсіздік, соның ішінде терроризммен күрес, діни экстремизмнің алдын алуда қоғамның алар орны, кез келген террорлық немесе экстремистік жағдайларда бей-жай қалмау мәселелері ғылыми тұрғыда талқыланды.

Конференция барысында ұлттық қауіпсіздікті қамтамасыз ету бойынша Қазақстан стратегиясын іске асыруда қабылданып жатқан шаралардың тиімділігін арттыру мен сараптамалық ой мен бағалауларды құрылымдық алмасу ұсыныстары талқыланды.

Барлық жаңалықтар