Астанада ішкі істер органы қызметкерлерінің арасында мемлекеттік тілді білу дәрежесін тексеретін республикалық конкурс болып өтті

«Іс-шараның мақсаты – ішкі істер органдарында тіл саясатын насихаттау, ІІО қызметкерлерінің оң имиджін нығайту, қызметкерлерді Отанға, тілге, өз елінің тарихына деген патриоттық тұрғыда тәрбиелеу, мемлекеттік тілдің қолданылу аясын кеңейту, тіл мәдениетін көтеру, көркем тіл мен әдебиетті насихаттауды жандандыру болып табылады», - деп хабарламада нақтыланған.

Байқауға республиканың барлық аймақтарындағы ішкі істер бөліністерінің құрама командалары қатысты. Жалпы алғанда, байқауға барлық облыстардың ІІД қызметкерлерінен, сондай-ақ жоғарғы және арнайы оқу орындарынан барлығы 21 команда сайысқа түсті.

Жүлделердің ішінде: ІІМ шипажайларына жолдамалар, ведомстволық басылымдарға жазылу, «Алатау» спорт кешеніне жылдық тегін абонементтер мен спорт киімдері бар. Байқаудың соңы қазақстандық эстрада жұлдыздарының концертімен жалғасты.  

Сонымен қатар, республикалық іс-шараның аясында «Парасатты полицей дегеніміз кім?», «Туған тілім-тұғырым», «Мен ата-анамды мақтан тұтамын» атты тақырыптарда шығармашылық байқаудың қорытындылары жария болды.