• Басты
  • Жеңістің 70 жылдығына орай ШҚО 1200 іс-шара өткізілді (ФОТО)

Жеңістің 70 жылдығына орай ШҚО 1200 іс-шара өткізілді (ФОТО)

11 Мамыр, 2015 14:32
Шығыс Қазақстан облысында Жеңістің 70 жылдығы кең ауқымда аталып өтті. Мерейлі мерейтойға орай, облыс орталығының Республика алаңында мерекелік концерт ұйымдастырылып, ҰОС және тыл ардагерлерін, қала тұрғындары мен қонақтарын облыс әкімі Даниал Ахметов құттықтады, деп хабарлайды ШҚО Ақпарат орталығы.

«Біз бүгін Ұлы Жеңіс мерейтойын  зор қуанышпен қарсы ала отырып, соғыстан оралмаған майдангерлер рухтарының алдында, қатары күн санап сиреп бара жатқан ардагерлер алдында бас иеміз», – деді Д.Ахметов.

Айта кету керек, Ұлы Отан соғысы жылдарында Шығыс Қазақстаннан майданға 170 мың адам аттанып, оның 96 мыңы оралмаған. 109 ардагер Кеңес одағының батыры атағына ие болып, 22 шығысқазақстандық Құрмет орденінің толық Кавалері атағына ие болған. Сондай-ақ, облыстың 9 мың тыл ардагері «Ұлы Отан соғысындағы ерен еңбегі үшін» медальдарімен марапатталған.

«Елбасы Нұрсұлтан Әбішұлы Назарбаевтың басшылығымен елімізде  жүргізіліп отырған саясаттың ең басты қағидасы бейбітшілік пен тыныштықты сақтау. Жастарды бүгінгі бейбіт өмір сыйлаған аға ұрпақ өкілдерінің ерліктері үлгісінде тәрбиелеу. Біз адамзат қауымының қас жауы фашизмді жойған батырлардың ұрпағы екенімізді әрқашан мақтан тұтамыз, – деді облыс басшысы.

Жеңіс күнін мерекелеу аясында облыстың қалалары мен аудандарында митингтер, еске алу акциялары, әдеби кештер, шерулер, концерттік бағдарламалар, әскери әндер фестивальдері, спорттық сайыстар өткізілді. Айта кету керек, жыл басынан бері Жеңістің 70 жылдығына орай, 53 мың адамның қатысуымен 1200 іс-шара өткізілді.

 

Барлық жаңалықтар