• Басты
  • Каирде ҰОС Жеңістің 70 жылдығына орай фотокөрме ашылды
9 Мамыр, 2015 15:48

Каирде ҰОС Жеңістің 70 жылдығына орай фотокөрме ашылды

2015 жылдың 6-сәуірінде Мысыр Араб Республикасының Мәдениет министрлігінің қолдауымен Қазақстанның Каирдегі Елшілігі Армения, Әзірбайжан, Беларусь, Ресей, Өзбекістан және Тәжікстан елшіліктерімен бірлесе отырып, Мысыр халықаралық мәдени ынтымақтастық орталығында Ұлы Отан соғысындағы Жеңістің 70 жылдығына орай фотокөрменің ашылу салтанаты өтті.
Каирде ҰОС Жеңістің 70 жылдығына орай фотокөрме ашылды

Оған мысырлық мемлекеттік органдардың жоғары лауазымды тұлғалары, қоғамдық, саяси және мәдени қайраткерлер, Каирде тіркелген шет мемлекеттердің дипломатиялық миссияларының басшылары мен қызметкерлері және жергілікті БАҚ өкілдері қатысты.

Ашылу салтанатында МАР Сыртқы істер министрінің орынбасары Ясер Мурад және аталған ТМД елшілері құттықтау сөздерін сөйледі. Еліміздің Мысырдағы Елшісі Берік Арын қатысушыларды осы маңызды күнімен құттықтай отырып, жер жүзіндегі бейбітшілікті қалпына келтіру үшін Қазақстанның фашизмді жеңуде қосқан үлесін атап өтті. «Біз бүгінгі қуанышқа толы бейбіт ашық аспанымыз үшін өмірлерін қиып, денсаулықтарын сарп еткен бабаларымыздың ерлігін мақтанышпен еске түсіреміз», – деп атап өтті Елші.

Фотокөрме келушілерді бостандық үшін күрескен адамдардың ұлы қаһармандығы мен ерліктеріне толы Ұлы Отан соғысы тарихымен, сондай-ақ  фашизмді жоюдағы қиын кезеңдерімен танысуға мүмкіндік береді. Экспозиция негізіне бұрынғы КСРО елдерінің Кеңес Одағын және Еуропа мемлекеттерін фашистік басқыншылардан азат етудегі рөлі, антигитлерлік коалицияны құру және соғыс жылдарында одақтастардың өзара іс-қимылдарына қатысты аталмыш елшіліктер дайындаған фотоматериалдар кірді. Тақырыптық фотокөрме 2015 жылғы 6-13 мамыр аралығында барлық қалаушылар үшін жұмыс істейтін болады. 

 

Барлық жаңалықтар