Мемлекет басшысы Ұлыбританияның Премьер-Министрін Парламенттік сайлауда Консервативтік партияның жеңіске жетуімен құттықтады
8 Мамыр, 2015 20:11
Елбасы Ұлыбритания және Солтүстік Ирландия Біріккен Корольдігінің премьер-министрі Дэвид Кэмеронға Консервативтік партияның парламенттік сайлаудағы жеңісіне байланысты құттықтау жеделхатын жолдады, деп хабарлайды Ақорданың баспасөз қызметі.
Мемлекет басшысы Қазақстан халқының және жеке өзінің атынан құттықтады.
«Бұл жеңіс Ұлыбритания халқының Сіздің саясатыңызға білдірген айқын қолдауының көрсеткіші екені анық. Сіздің Премьер-министр лауазымындағы қызметіңіз еліңіздің өркендеуіне және Қазақстан мен Ұлыбритания арасындағы стратегиялық әріптестіктің одан әрі дамуына септігін тигізетініне сенімдімін», – делінген жеделхатта.
Нұрсұлтан Назарбаев Д.Кэмеронға зор денсаулық пен қажымас қайрат, жауапты қызметіне табыс, ал достас Ұлыбритания халқына береке-бірлік пен бақуаттылық тіледі.
