Қазақстанның әскери қызметшілері БҰҰ медальдарымен наградталды

Біріккен Ұлттар Ұйымының Батыс Сахардағы (MINURSO) референдумды өткізу кезіндегі бейбітшілік пен қауіпсіздікті қолдау жөніндегі бітімгершілік миссиясын орындау барысында қазақстандық офицерлер капитан Бақтияр Ақбалаев пен капитан Темірлан Мүсәпіров БҰҰ медалдарымен наградталды.

Естеріңізге сала кетсек, 2014 жылдың шілдесінен бастап қазіргі уақытқа дейін «ҚАЗБРИГ» қазақстандық бітімгершілік бригадасының 4 офицері Батыс Сахарадағы референдумды өткізу кезіндегі бейбітшілік пен қауіпсіздікті қолдау жөніндегі БҰҰ миссиясында бақылаушылар ретінде қызмет атқаруда. Бұдан басқа Қазақстан Республикасы Қарулы Күштерінің 2 офицері ағымдағы жылдың наурызынан бастап Кот-д’Ивуардағы БҰҰ бітімгершілік миссиясында (UNOCI) әскери бақылаушы болып жүр.

ҚР Парламентінің 2013 жылғы 20 желтоқсандағы Қаулысына сәйкес, Қазақстан Республикасы Қарулы Күштері құрамынан БҰҰ бітімгершілік миссияларының әскери бақылаушылары ретінде 20 әскери қызметші іріктеліп, Гаитиде, Батыс Сахарада, Кот-д’Ивуарда және Либерияда қызмет етуге даярланды.

Қазіргі уақытта Батыс Сахардағы (MINURSO) БҰҰ бітімгерлік миссиясына «Қазбат» қазақстандық бітімгершілік батальонынан бір офицерді әскери бақылаушы ретінде жіберу жөніндегі жұмыстар жүргізілуде.