Ержүректілік пен батырлықтың арқасында біз жауды жеңдік (ФОТО)
Шараға облыстық партия филиалы төрағасының бірінші орынбасары Серік Мұқанов, облыстық партия филиалының ұжымы, аудан әкімшілігі, БАҚ өкілдері қатысты.
Кездесу барысында филиал басшылығы ардагермен пікір алмасып, «Нұр Отан» партиясы төрағасының Бірінші орынбасары Бауыржан Байбектің құттықтау хаты мен партия атынан сыйлық табыстады. Артынша, ардагер келген қонақтарға алғысын айтып, батасын берді.
«Кезінде от пен оқтың арасында Отан үшін жанын құрбан еткен қаншама жандар ажал құшты. Ержүректілік, батылдық таныта білгенның арқасында жауды жеңдік. Бүгін міне осындай бейбіт күн кешудеміз. Елімізде ешқашан соғыс болмасын. Мемлекетіміз гүлдене берсін! Елбасымыз аман болсын!»,- дейді Кеңес Одағының батыры Иван Косенков.
Айта кетейік, соғыс жылдары Алматы облысынан 120 026 адам жұмылдырылды. Оның ішінде қаза болғаны – 57 459 адам, оның ішінде із-түсіз жоғалғаны – 25 760 адам. Бүгінде облыс бойынша көзі тірі - 343 ардагер бар.
Ұлы Отан соғысы жылдары Алматы облысынан майданға шақырылған азаматтардан Кеңес Одағының Батыры атағына ие болғаны – 53 адам.
Қазіргі уақытта Қазақстан бойынша жалғыз Кеңес Одағының батыры Иван Васильевич КОСЕНКОВ тұрады, 1923 жылы 1 қаңтарда туған ол отставкадағы сержант. 1941 жылы 27 желтоқсанда Бородулиха АӘК шақырылған. 1118 атқыштар полкінде қызмет еткен, 76 мм зеңбіректің көздеушісі. Кеңес Одағының батыры атағына 1943 жылы Днепр өзенінен соғыса өту кезінде ұсынылды. Кеңес Одағының батыры атағы 1944 жылдың 22 ақпанында № 4943 берілді. «Алтын Жұлдыз» медалі мен Ленин ордені және Кеңес Одағының маршалы Жуков атындағы ордендерінің кавалері, I, II дәрежелі Ұлы Отан соғысы және «Құрмет», «Барыс» ордендерімен марапатталған.
Батырға «Қаратал ауданының құрметті азаматы», «Құрметті теміржолшы» атақтары берілген. Сонымен қатар, Үштөбе қаласында И.Косенков көшесі мен бастауыш партия ұйымы бар.
