Грекия Республикасының Президенті Н.Назарбаевты сайлаудағы жеңісімен құттықтады
8 Мамыр, 2015 16:56
Грекия Республикасының Президенті Прокопис Павлопулостың Нұрсұлтан Назарбаевты Қазақстан Республикасы Президенті болып сайлануына байланысты құттықтау жеделхаты келіп түсті, деп хабарлады Ақорданың баспасөз қызметі.
П.Павлопулос Қазақстан мен Грекия арасындағы берік әрі достық қатынастар мықты негізге, екі елдің бірлескен күн тәртібіндегі мәселелерді ортақ күш-жігер ғана табысты шеше алады деген сенімге сүйенетінін атап өткен.
«Біздің мемлекеттеріміз екі республика халықтарының игілігі жолындағы саяси және экономикалық байланыстарды кеңейту мақсатындағы бірлескен жұмыс пен ынтымақтастықты жалғастыратынына сенімдімін», – делінген жеделхатта.
Грекия Президенті Нұрсұлтан Назарбаевқа мықты денсаулық, ал Қазақстан халқына бақуаттылық пен бақ-береке тіледі.
